మూడో షెడ్యూల్ పూర్తి చేసుకున్న 'శ్రీనివాస మంగాపురం'

సూపర్ స్టార్ మహేశ్ బాబు అన్న కుమారుడు జయకృష్ణ ఘట్టమనేని వెండితెరకు హీరోగా పరిచయమవుతున్న చిత్రం... 'శ్రీనివాస మంగాపురం'. 'ఆర్‌ఎక్స్ 100', 'మంగళవారం' వంటి రా అండ్ రస్టిక్ చిత్రాలతో తనకంటూ ప్రత్యేక గుర్తింపు తెచ్చుకున్న దర్శకుడు అజయ్ భూపతి ఈ సినిమాను తెరకెక్కిస్తున్నారు. ప్రేక్షకులు ఆసక్తిగా ఎదురుచూస్తున్న ఈ సినిమా షూటింగ్ ప్రస్తుతం శరవేగంగా జరుగుతోంది. తాజాగా తిరుపతిలో చేపట్టిన కీలకమైన మూడో షెడ్యూల్‌ను చిత్రయూనిట్ విజయవంతంగా పూర్తి చేసింది.

ఈ షెడ్యూల్‌లో హీరో జయకృష్ణ, హీరోయిన్ రాషా తడాని, ఇతర ప్రధాన తారాగణంపై ముఖ్యమైన సన్నివేశాలను చిత్రీకరించినట్లు సమాచారం. ఈ షెడ్యూల్ ముగియడంతో సినిమా షూటింగ్ దాదాపు 60 శాతం పూర్తయింది. భారీ నిర్మాణ విలువలతో, ఎక్కడా రాజీపడకుండా ఈ చిత్రాన్ని రూపొందిస్తున్నట్లు చిత్రవర్గాలు తెలిపాయి.

సూపర్ స్టార్ కృష్ణ, మహేశ్ బాబు నటవారసత్వాన్ని కొనసాగిస్తూ జయకృష్ణ ఎంట్రీ ఇస్తుండటంతో అభిమానుల్లో భారీ అంచనాలు నెలకొన్నాయి. అలాగే, ప్రముఖ బాలీవుడ్ నటి రవీనా టాండన్ కుమార్తె రాషా తడాని ఈ సినిమాతోనే టాలీవుడ్‌కు పరిచయమవుతుండటం మరో విశేషం. ఈ చిత్రంలో సీనియర్ నటుడు మోహన్ బాబు 'వెంకటప్పయ నాయుడు' అనే కీలక పాత్రలో కనిపించనున్నారు.

ప్రముఖ నిర్మాత అశ్వినీదత్ సమర్పణలో, చందమామ కథలు బ్యానర్‌పై పి. కిరణ్ ఈ చిత్రాన్ని నిర్మిస్తున్నారు. ఈ సినిమాకు జాతీయ అవార్డు గ్రహీత జి.వి. ప్రకాశ్ కుమార్ సంగీతం అందిస్తుండగా, జయకృష్ణ గుమ్మడి సినిమాటోగ్రఫీ, సాహి సురేష్ ప్రొడక్షన్ డిజైన్ బాధ్యతలు నిర్వర్తిస్తున్నారు. అజయ్ భూపతి మార్క్ టేకింగ్, కొత్త జంట పరిచయంతో ఈ సినిమాపై సినీ వర్గాల్లో ఆసక్తి నెలకొంది.